‘होस्टेल ३’को छायांकन ४९ दिनमा प्याकअप

सशान कँडेलको डेब्यू निर्देशनमा बनेको फिल्म ‘होस्टेल ३’को छायांकन ४९ दिनमा प्याकअप गरिएको हो । यो फिल्मको प्रदर्शन मिति भने टुंगो लागेको छैन । यसअघि फागुनको १६ गतेबाट रिलिज हुने भनिए पनि उक्त मितिबाट फिल्म पोष्टपोन्ड भइसकेको छ । 

अब, केही कलाकारहरुको शारीरिक परिवर्तन आवश्यक रहेकाले एक साताको फुटकर दृश्यको छायांकन भने बाँकी रहेको निर्माणपक्षले बताएको छ । 

यो फिल्ममा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुष लगायतका कलाकारहरुको अभिनय छ । यो फिल्मको कथा माधव शर्माले लेखेका हुन् ।

सम्मान इन्टरटेन्मेन्टले आरोन कन फिल्मसँग सहकार्य गर्दै निर्माण गरेको फिल्ममा अर्जुन तिवारीको डीओपी, वुद्द थापा र मनोज खत्रीको छायांकन छ । फिल्ममा शंकर कोइराला कार्यकारी निर्माता, कर्ण कार्की र गोविन्द अधिकारी निर्माता र सुरेश कँडेल सह–निर्माताको रुपमा छन् । 

‘होस्टेल’को सिरिज नेपाली फिल्म क्षेत्रमा स्टार जन्माउने सिरिजको रुपमा चिनिएको छ । अनमोल केसी, सलोन बस्नेत, नाजिर हुसेन, सुशील श्रेष्ठ, स्वस्तिमा खड्का जस्ता स्टारहरू यही सिरिजबाट जन्मिएका हुन् । अब, यसको तेस्रो सिरिजबाट कुन कलाकार स्टार बन्छन् हेर्न बाँकी छ ।

तर, फिल्मको कुनै पनि लुक्स सार्वजनिक नहुँदै यसको क्रेज चुलिएको छ । विभिन्न देशबाट फिल्मको अधिकार विक्रीका लागि पनि कुराकानी भइरहेको र केही देशमा विक्री भइसकेको निर्माणपक्षले बताएको छ ।