‘एक्लो १’मा यस्तो छ कविता र जेमीको लुक्स

साइन्स फिक्सन कथामा निर्माण भएको फिल्म ‘एक्लो १’का दुई कलाकारहरुको लुक्स  सार्वजनिक गरिएको छ । प्रदीप शाहीको निर्देशनमा तयार भएको यो फिल्मका मुख्य दुई कलाकारहरू कविता नेपाली र जेमी बेकनको लुक्स सार्वजनिक गरिएको हो ।

फिल्ममा कविता ‘एरियल’ र जेमी ‘ज्याक’को भूमिकामा छन् । दुबैको गेटअपले फिल्मप्रतिको दर्शकको चाहना बढाउने देखिन्छ । दुबैको पृष्ठभूमिमा अन्तरिक्षको तस्वीर समेत देख्न पाइन्छ । यो फिल्ममा प्रदीप खड्का, बेनिशा हमाल, विजय लामा, सुनील थापा, दिया पुन, दिनेश डीसी, सुरज सिंह ठकुरी, एवनराज उप्रेती लगायतका कलाकारहरुको पनि अभिनय छ ।

निर्माणपक्षले यसअघि नै नायक प्रदीप खड्काको गेटअप सार्वजनिक गरिसकेको छ । यो फिल्मको छायांकन अपर मुस्ताङ र काठमाडौंमा गरिएको हो । फिल्मका कार्यकारी निर्माता क्षितिज सुवेदी हुन् । निर्देशक शाहीले अन्तराष्ट्रिय बजारमा समेत पुर्याउने उद्देश्यले यो फिल्म निर्माण गरिएको बताए ।

शाइ प्रोडक्सन नेपालको ब्यानरमा निर्माण भएको यो फिल्ममा बाबु श्रेष्ठको छायांकन, राजु तामाङको एक्सन छ । राजकुमार गुरुङ, हरि श्रेष्ठ, विष्णु तामाङ, उत्सव विष्ट, संगीता वादी श्रेष्ठ, भाइराजा थापा, नवीन सिवा, बागवीर पुनको यो फिल्ममा लगानी छ ।