बैशाख १९ मा ‘झिल्को’

फिल्म ‘झिल्को’को प्रदर्शन मिति तय गरिएको छ । यादवकुमार भट्टराइको निर्देशनमा तयार भएको यो फिल्मलाई आउँदो बर्षको वैशाख १९ गतेबाट रिलिज गर्ने घोषणा निर्माणपक्षले गरेको छ ।

यसअघि फस्टलुक सार्वजनिक गर्दै फिल्मको प्रदर्शन मिति पौष ५ लाई तय गरिएको थियो । फिल्मको पोष्ट प्रोडक्सनमा थप केही काम गर्नुपर्ने कारण देखाउँदै प्रदर्शन मिति पोष्टपोन्ड गरिएको हो । 

यादवले यसअघि ‘झोला र भोर’ फिल्म निर्देशन गरेका थिए । ‘झिल्को’मा सुनील पोखरेल, वर्षा सिवाकोटी, भोलाराज सापकोटा, विशाल पोखरेल र आयुषी ढकालको मुख्य भूमिका छ । मोबाइल दुर्व्यसनका कारण बालबालिकामा देखिने समस्या र त्यसले समाजलाई पार्ने प्रभावबारे यो फिल्मले कथा भन्छ ।

यो फिल्मको ९० प्रतिशत दृश्य गतबर्षको चैत्रमा नै सकिएको थियो । केही दृष्य फरक अन्तर राखेर खिचिएको हो । यो फिल्ममा पटकथा तथा संवाद भट्टराइको साथमा अरुणदेव जोशी र देव व्रतले तयार पारेका हुन् ।

फिल्ममा सुशीला आचार्य र राम गोपाल थापाको लगानी छ । उमेश पौडेल फिल्मका कार्यकारी निर्माता हुन् । फिल्ममा दीपक बज्राचार्यको छायांकन, चण्डिप्रसाद काफ्ले र दीपक शर्माको संगीत, निमेष श्रेष्ठको सम्पादन छ ।