माघ २५ मा ‘जुना’ रिलिज हुने

फिल्म ‘जुना’को प्रदर्शन मिति तय गरिएको छ । यो फिल्म माघको २५ गतेबाट रिलिजमा आउने पक्का भएको छ । बाल विवाह तथा महिला हिंसा निरुत्साहित गर्ने उद्देश्यले यो फिल्मको निर्माण भएको हो ।

गोदावरी फिल्म प्रोडक्सन एण्ड रिसर्च सेन्टर प्रालिको व्यानरमा निर्माण भएको फिल्मलाई जीवन सेञ्चुरीले निर्देशन गरेका हुन् । यो फिल्ममा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमला बोहोरा, अस्मिता बस्नेत, खगेन्द्र न्यौपाने, विकास आनन्द लगायतका कलाकारहरुको अभिनय छ ।

यो फिल्मले बाल विवाह सामाजिक अपराध भएकाले यसलाई अन्त्य गर्नुपर्ने कथा उठान गरेको छ । पर्वतको सालिजा ओख्रेनीमा छायांकन भएको यो फिल्ममा दीपकप्रसाद घिमिरेको लगानी छ । फिल्ममा राजबहादुर सानेको कथा, बीबी अनुरागी र रमेश सेन्चुरीको संगीत छ ।