दया र आँचलको ‘दुखी आत्मा’ प्रतिक्षित बन्दै

निर्देशक दीपेन्द्र लामा फिल्म क्षेत्रमा लक्की मानिन्छन् । किनकी, उनले निर्देशन गरेका फिल्म बक्स अफिसमा सुपरहिट देखि हिट छन् । बक्स अफिसमा ‘गोपी’ असफल भएपनि यसले ‘राष्ट्रिय चलचित्र पुरस्कार’ नै जितेको थियो । यो बाहेक दीपेन्द्रका सबै फिल्म बक्स अफिसमा सुपरहिट छन् । ‘घामपानी, छ माया छपक्कै, २ नम्बरी, नांगो गाउँ’ उनका सफल फिल्म हुन् । 

उनै, दीपेन्द्रको नयाँ फिल्म ‘दुखी आत्मा’ फागुनको २ गतेबाट रिलिजमा आउँदैछ । यो फिल्मको फस्टलुक सार्वजनिक भएसँगै विदेशबाट पनि उच्च माग आएको वुझिएको छ । फिल्मका निर्माता हिमाल कडरिया टिजर, ट्रेलर सार्वजनिक नहुँदै फिल्मको उच्च माग विदेशबाट हुन थालेको बताउँछन् । केही देशमा फिल्मको अधिकार विक्री भइसकेको उनको भनाई छ । 

यो फिल्ममा दयाहाङ राई, आँचल शर्मा, अनुप विक्रम शाही, वुद्दि तामाङ जस्ता कलाकारहरुको अभिनय छ । दया र आँचलले यसअघि फिल्म ‘डिग्री माइला’मा पर्दा शेयर गरिसकेका छन् । यो जोडीको दोस्रो फिल्मलाई पनि दर्शकले मन पराउने विश्वास निर्माणपक्षको छ । 

यसपटक, फिल्म हेर्दा दर्शकले भरपूर मनोरञ्जन लिने विश्वास निर्माणपक्षको छ । यसैले, फस्टलुक सार्वजनिक भएसँगै यो फिल्म प्रतीक्षित बनेको हो ।