‘दुखी आत्मा’को फस्टलुकमा आँचलसँग दयाको प्रेम

फिल्म ‘दुखी आत्मा’को फस्टलुक रिलिज भएको छ । दीपेन्द्र लामाको निर्देशनमा तयार भएको यो फिल्मको ३ वटा पोस्टर सार्वजनिक गर्दै प्रचार आरम्भ गरिएको हो । 

सार्वजनिक पोस्टरमध्ये एउटामा नायक दयाहाङ राइलाई सिंगल देखाइएको छ । यस्तै, अर्को एक पोष्टरमा दया नायिका आँचल शर्मासँग रोमान्टिक देखिएका छन् । अर्को एक पोष्टरमा भने फिल्मका मुख्य कलाकारहरू अनुप विक्रम शाही, वुद्दि तामाङ, रेअर राई, लोकेन्द्र लेखक र आशान्त शर्मालाई प्रस्तुत गरिएको छ ।

फागुनको २ गतेबाट रिलिजमा आउने यो फिल्मको पोस्टरले दर्शकलाई फिल्मबारे उत्सुकता जगाउने अपेक्षा निर्माणपक्षको छ । क्लक वर्क क्रियशनको ब्यानरमा निर्माण भएको यो फिल्ममा हिमाल कडरियाको लगानी छ । सुदिप ढकाल कार्यकारी निर्माता रहेको यो फिल्ममा कवि श्रवण मुकारुङको १० पेचिला कविता पनि समावेश गरिएको छ । आलोक शुक्लाको डीओपी रहेको यो फिल्ममा निमेष श्रेष्ठको सम्पादन छ । 

यसअघि दीपेन्द्र र हिमालले सहकार्य गर्दै ‘नाङ्गो गाउँ’ नामक फिल्म दर्शकमाझ ल्याएका थिए । अब, ‘दुखी आत्मा’ले पनि दर्शकको साथ पाउने अपेक्षा यो टिमको छ ।