वर्षाको जोडीः पहिले ‘राजा’, अहिले ‘माग्ने राजा’

नायिका वर्षा सिवाकोटीले नयाँ फिल्म ‘माग्ने राजा’ साइन गरेकी छिन् । फागुनको १ गतेबाट छायांकनमा जान लागेको यो फिल्ममा कलाकार केदार घिमिरे केन्द्रीय भूमिकामा रहने पक्का भइसकेको छ । अब, फिल्ममा वर्षाले केदारसँग काम गर्ने पक्का भएको छ । मुनाल घिमिरेको निर्माणमा तयार हुन लागेको यो फिल्ममा सामिप्यराज तिमिल्सिनाको कथा छ । 

नायिका सिवाकोटीले यस अगाडि फिल्म ‘छक्का पन्जा ५’मा पनि कलाकार केदार घिमिरेसँग काम गरेकी थिइन् । तर, उक्त फिल्ममा वर्षाको जोडीको रुपमा दीपकराज गिरी थिए । फिल्ममा दीपकले ‘राजा’को भूमिकामा काम गरेका थिए । 

फिल्ममा वर्षालाई ‘महारानी’को रुपमा चित्रित गरिएको थियो । यसैले, यसअघि ‘राजा’सँग काम गरेकी वर्षाले अब ‘माग्ने राजा’सँग काम गर्ने पक्का भएको छ । फिल्ममा वर्षाको भूमिका के हो भन्ने खुलाइएको छैन ।