नेपाली बक्स अफिसमा ‘पुष्पा २’को तुफानी

आजबाट विश्व बजारमा रिलिजमा आएको फिल्म ‘पुष्पा २’ले भारतमा मात्र नभएर नेपाली बक्स अफिसमा पनि सुनामी ल्याएको छ । यो फिल्मले देशभर ५९१ शोज पाएको छ । हलमा २४ घन्टा नै यो फिल्म प्रदर्शन गरिएको छ । आज बिहिबार बिहान सवा ४ बजेबाट मध्यरातसम्म फिल्मको शोज राखिएको छ । सबै शोजमा दर्शकको अकुपेन्सी उच्च छ । 

यसैले, नेपाली बक्स अफिसमा यो फिल्मले सुनामी ल्याउने आँकलन गरिएको छ । ४ करोड भारतीय रुपैयाँमा नेपाल भित्रिएको यो फिल्मले आज मात्र ४ करोड माथिको कलेक्शन गर्न सक्छ । 
एकै दिनमा सर्वाधिक कमाई गर्ने फिल्मको रेकर्ड नेपालमा ‘पुर्ण बहादुरको सारङ्गी’को छ । जसले, रिलिजको दोस्रो शनिबार ३ करोड ९१ लाखको व्यापार गरेको थियो । नेपालमा ‘पुष्पा २’ले यो रेकर्ड तोड्ने निश्चित जस्तै छ । 

यस्तै, यो फिल्मले नेपालमा सर्वाधिक ओपनिङको रेकर्ड समेत राख्ने देखिएको छ । अल्लु अर्जुन र रश्मिका मन्दना अभिनित यो फिल्मका कारण हलमा लागिरहेका ३ नेपाली फिल्म विस्थापित भएका छन् । ‘पुर्ण बहादुरको सारङ्गी र तेल भिसा’ सीमित शोजमा खुम्चिएका छन् भने ‘ह्रस्व दीर्घ’ आजबाट हलबाट उत्रिएको छ । 

फिल्मको पहिलो श्रृङ्खलाले बनाएको क्रेजको फाइदा दोस्रो सिक्वेलले लिएको छ । फिल्मको तेस्रो सिक्वेल बन्ने घोषणा पनि निर्माणपक्षले गरिसकेको छ ।