फागुन २ मा ‘जेरीः अन टप’ रिलिज नहुने

सुयोग गुरुङको निर्देशनमा फिल्म ‘जेरीः अन टप’को छायांकन धमाधम चलिरहेको छ । सरोज न्यौपानेको निर्माणमा तयार भइरहेको यो फिल्मको छायांकन लुक्लापछि काठमाडौंमा भइरहेको छ । 
निर्माणपक्षले फिल्मको शुभसाइत समारोहमा नै फागुनको २ गतेबाट फिल्म रिलिज हुने बताएको थियो । तर, अब निर्धारित मितिमा फिल्म रिलिज हुन नसक्ने जानकारी निर्माणपक्षले दिएको छ। 

निर्माता न्यौपानेको अनुसार, निर्धारित मितिमा फिल्मको काम नै नसकिने अवस्था भएकाले रिलिज गर्न नसकिएको हो । उनले, फिल्म अर्को बर्ष मात्र रिलिज हुने जानकारी दिए । अर्को बर्षको सुरुवाती महिनामा नै फिल्म रिलिज गर्ने योजना निर्माणपक्षको छ ।

काठमाडौंमा छायांकन सकेर यसको टिम लद्दाक जाने तयारीमा छ । लद्दाकमा खिचेपछि बल्ल फिल्मको छायांकन सकिनेछ । फिल्मको पोष्ट प्रोडक्सनमा पनि समय लाग्नेछ । यही कारणले, यो फिल्म निर्धारित मितिमा रिलिज हुन नसकेको हो । 

यो फिल्ममा अनमोल केसी, भुवन केसी, केदार घिमिरे, जसिता गुरुङ, आँचल शर्मा लगायतका कलाकारहरुको अभिनय छ ।