प्रियंका र दीयाको ‘ममी’ माघ २५ बाट रिलिजमा आउने

नायिकाद्धय प्रियंका कार्की र दीया मास्केको मुख्य भूमिका रहेको फिल्म ‘ममी’को फस्टलुक सार्वजनिक गर्दै प्रदर्शन मिति तय गरिएको छ । यो फिल्मलाई माघको २५ गतेबाट रिलिज गर्ने घोषणा यसको निर्माणपक्षले गरेको छ । सार्वजनिक पोष्टरमा प्रियंकालाई गम्भीर भावमा प्रस्तुत गरिएको छ भने दीयाको रगताम्य अनुहारसहित डरलाग्दो अवतारमा प्रस्तुत गरिएको छ ।

यो फिल्मले एक परिवारकी छोरी र कुकुरको दुःखद निधनपछि रहस्यमय कालो बिरालो अपनाएसँगै निम्तिने विपत्तिलाई देखाउने छ ।

एसओ ट्वान्टी फाइभको प्रस्तुतिमा निर्माण भएको यो फिल्ममा प्रियंका र दीयाको साथमा सुलक्षण भारती, समिप निरौला, घनश्याम जोशी, आयुषी ढकाल, जेभिस श्रेष्ठ, गुराँस ढकाल, रीना ढकाल लगायतका कलाकारहरुको अभिनय छ । फिल्ममा समर निरौलाको लेखन तथा निर्देशन छ । समरले यही फिल्मबाट निर्देशनमा डेब्यू समेत गरेका हुन् । 

लोकराज जोशी र पूर्णिमा जोशीको लगानीमा निर्माण भएको फिल्ममा सुमन कोइराला कार्यकारी निर्माताको रुपमा छन् । शरद महत्तोको छायांकन रहेको यो फिल्मलाई काठमाडौंमा काफिया फिल्मस् र मोफसलमा कुवेर फिल्मस्ले वितरण गर्नेछ ।