मल्टिस्टारर फिल्मको लहर

निर्माता हिमाल कडरियाले निर्माण गर्न लागेको नयाँ फिल्म ‘महाभोज’मा मल्टिस्टारर कलाकारको लाइन लामो छ । फिल्ममा उनले दयाहाङ राई, आर्यन सिग्देल, खगेन्द्र लामिछाने, अनुप विक्रम शाही, मिरुना मगर, अञ्जना बराइली, मलिका महत्त जस्ता कलाकारहरूलाई अनुबन्धित गरेका छन् । हिमालले कलाकारहरुमै राम्रो रकम खर्च गरेको प्रष्ट हुन्छ । 

नेपालमा बनिरहेका र बन्ने घोषणा भएका धेरै फिल्मलाई हेर्ने हो भने मल्टिस्टारर कलाकारहरुको लाइनअप देखिएको छ । 

निर्माता रोहित अधिकारीले निर्माण गर्न लागेको नयाँ फिल्म ‘माइतीघर’मा पनि मल्टिस्टारर कलाकारहरुको लाइनअप हुने बताइएको छ । फिल्ममा केदार घिमिरे र उपासना सिंह ठकुरी फाइनल भइसकेका छन् । अझै, दुई नायक र एक नायिका यो फिल्ममा अनुबन्धित हुने रोहितको भनाई छ । 

निर्माता किरण नेपालीले बनाउन लागेको नयाँ फिल्म ‘कल्ली’को अवस्था पनि यस्तै छ । फिल्ममा सौगात मल्ल र बेनिशा हमाल फाइनल भइसकेका छन् । अझै, एक नायक र एक नायिका फाइनल गर्ने तयारी निर्माणपक्षको छ । यी बाहेक अन्य केही नाम चलेका कलाकारहरू पनि यो फिल्ममा छन् । 

निर्मात्री तथा निर्देशक कृषा चौलागाईंले बनाइरहेको फिल्म ‘पिताम्बर’मा कलाकारहरुको लामो लाइन छ । फिल्ममा सौगात मल्ल, प्रदीप खड्का, सुरक्षा पन्त, दिव्या रायमाझी, अनुप विक्रम शाही, सुपुष्पा भट्ट, दयाहाङ राई जस्ता कलाकारहरुको अभिनय छ । यो फिल्ममा पनि नाम चलेका स्टार कलाकारहरुको अभिनय देख्न सकिन्छ । 

पोष्ट प्रोडक्सनमा रहेको फिल्म ‘के घर के डेरा’मा पनि मल्टिस्टारर कलाकारहरुको लामो लाइनअप छ । यो फिल्ममा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरीको मुख्य भूमिका छ । 

निर्देशक सन्तोष सेनले निर्देशन गरिरहेको फिल्म ‘बलिदान’मा पनि नाम चलेका कलाकारहरुको लाइनअप लामो छ । फिल्ममा समिर भट्ट, सौगात मल्ल, अर्पण थापा, ऋचा शर्मा जस्ता कलाकारहरुको अभिनय छ । निर्माणपक्षले अझै नायिकाको नाम घोषणा गरिसकेको छैन । 

नेपाली फिल्म क्षेत्रमा केही कलाकारहरू मल्टिस्टारर फिल्ममा काम गर्न मान्दैनन् । तर, केही नाम चलेका कलाकारहरूलाई भने यसले समस्या खासै परेको पाइँदैन । यो बर्ष रिलिजमा आएको ‘पुजार सार्की’ पनि मल्टिस्टारर कलाकारहरूले भरिएको थियो ।

तर, बक्स अफिसमा यसै बर्ष ब्लकबस्टर भएका केही फिल्म भने कथावस्तु र कलाकारहरुको अभिनयले दर्शकमाझ हिट भयो । तर, यो बर्ष र आगामी बर्ष रिलिजमा आउन लागेका धेरै फिल्ममा मल्टिस्टारर कलाकारहरुको लाइनअप लामो देखिएको छ ।