विपिन र मिरुनाको ‘उनको स्वीटर’ बैशाख २६ बाट रिलिज हुने

आर्टमाण्डुको प्रस्तुतिमा तयार भएको फिल्म ‘उनको स्वीटर’को रिलिज मिति तय गरिएको छ । फिल्मको नयाँ पोस्टर सार्वजनिक गर्दै प्रदर्शन मिति सार्वजनिक गरिएको हो । 

नविन चौहानको लेखन तथा निर्देशनमा तयार भएको फिल्मलाई आउँदो वर्षको वैशाख २६ गतेबाट रिलिजमा ल्याउने घोषणा यसको निर्माणपक्षले गरेको छ । फिल्मको सार्वजनिक पोष्टरमा नायक विपिन कार्की र नायिका मिरुना मगरलाई देख्न सकिन्छ । सार्वजनिक पोष्टरमा मिरुना पछ्यौरा ओढेर मन्द मुस्कानमा मुस्कुराइरहेकी छिन् । यता, विपिनले भने डोको बोकेका छन् । 

फिल्ममा सुनील पोखरेल, माओत्से गुरुङ, विल्सन विक्रम राई, प्रेम सुब्बा, मेनुका प्रधान, एलेक्स पारस, परीक्षा लिम्बु लगायतका कलाकारहरुको अभिनय छ । फिल्ममा सुजन चापाँगाइको संगीत छ । फिल्मको सम्पूर्ण छायांकन पाँचथरमा गरिएको हो । 

फिल्ममा केन्द्र मोसन पिक्चर्स एसोसियट निर्माताको रुपमा रहेको छ । साहाङ चेम्जोङ, आशिष रिजाल, राजकुमार राई, प्रकाश बस्नेत, सन्तोष न्यौपाने फिल्मका सह–निर्माता हुन् । सागर बुढाथोकी र मिलन खत्री फिल्मका कार्यकारी निर्माता हुन् ।