‘परालको आगो’मा सुहाना थापा अनुवन्धित

कथाकार गुरु प्रसाद मैनालीको कृति ‘परालको आगो’मा आधारित रहेर बन्न लागेको फिल्ममा नायिका अनुबन्धित गरिएको छ । यो फिल्ममा नायिका सुहाना थापाले काम गर्ने पक्का भएको छ ।

फिल्म निर्माण कम्पनी हरि ओम सिने मेकर्सका तर्फबाट निर्माता सुशील पोखरेलले नायिका सुहाना थापालाई शुक्रबार फिल्ममा अनुबन्धित गरेका हुन् । फिल्ममा अनुबन्धित भएपछि नायिका थापा उत्साहित देखिइन् । उनले भनिन्–‘एउटा अमर कृतिमा काम गर्न पाउनु मेरो लागि सौभाग्यको कुरा हो । त्यहीकारण मैले घरबाहिरको फिल्म पहिलो पटक साइन गरेकी हुँ ।’ यो फिल्मलाई लक्ष्मण सुनारले निर्देशन गर्दैछन् ।

यो फिल्मलाई आउँदो बर्षको दशैंमा रिलिज गर्ने घोषणा यसको निर्माणपक्षले गरिसकेको छ । यही नाममा ४५ बर्ष अगाडि निर्देशक प्रताप सुब्बाले फिल्म बनाइसकेका छन् । निर्माता पोखरेलका अनुसार लोकेशन, प्रस्तुतीकरण, पटकथालाई फरक तरिकाले यो फिल्ममा प्रस्तुत गरिनेछ ।

फागुनदेखि छायांकनमा जाने फिल्मले दुई पात्र चामे र गौँथलीको झगडालाई प्रस्तुत गर्नेछ । फिल्ममा सुहाना गौँथलीको भूमिकामा देखिदैछिन् ।