अञ्जनाको प्रश्न–‘चल्ने भनेको के हो ?’

नायिका अन्जना बराइलीले ‘चल्ने भनेको के हो’ भनेर प्रश्न गरेकी छिन् । फिल्मले बम्पर व्यापार गर्दा पनि अञ्जनाको कामको खासै चर्चा नभइरहँदा उनी ओझेलमा परेको चर्चा भइरहेको छ । 

यही बिषयमा मिडियाकर्मीले सोधेको प्रश्नमा उनले भनिन्–‘मैले गरेको कामहरू हिट भइरहेका छन् । अब, विवादलाई चल्ने भनेको हो कि ? मलाई आफ्नो कर्म बरु बदनाम हुनुभन्दा गुमनाम नै गरेर गर्न मन लाग्छ । मैले आफ्नो लक्ष्यलाई पनि यसरी नै राखेकी छु ।’

उनले, आफूलाई कन्ट्रोभर्सीमा आएर चल्ने रहर नभएको सुनाइन् । भनिन्–‘मैले गरेको कामलाई दर्शकले मन पराइदिनु भएको छ । बुढा बा–आमा आएर राम्रो काम गरेकी छौं भन्नुहुन्छ । मेरो फिल्महरू कमर्सियल हिट भइराखेका छन् । अब, यो बाहेक चल्ने भनेको के रहेछ ?’

अञ्जनाले अभिनय गरेको फिल्म ‘महापुरुष, पुजार सार्की र पुर्ण बहादुरको सारङ्गी’ हिट भए । उनी नयाँ फिल्म ‘डोरी’मा अनुबन्धित भएकी छिन् ।