‘ह्रस्व दीर्घ’को उत्साहजनक सुरुवात, कस्तो छ प्रतिक्रिया ?

आज शुक्रबारदेखि रिलिजमा आएको फिल्म ‘ह्रस्व दीर्घ’ले बक्स अफिसमा उत्साहजनक सुरुवात गरेको छ । बिहानैबाट फिल्मले नेपालभरका हलमा सुखद व्यापार गरिरहेको छ । मध्यान्हदेखि फिल्मको व्यापार अझै बढेको भने रात्रीकालिन शोजहरुमा समेत दर्शकको चाप उच्च देखिएको छ । 

नीता ढुंगानाको लगानीमा हरिहर अधिकारीको कथा रहेको यो फिल्मलाई दर्शकले मन पराएका छन् । बिहानैबाट हलमा फिल्म हेर्न पुगेका दर्शकले यसको मेकिङ, कलाकारहरुको अभिनय, क्लाइमेक्सको दृश्य, गीतसंगीतलाई रुचाएका छन् । 

फिल्मको पहिलो हाफले औषत प्रतिक्रिया पाएको छ भने दोस्रो हाफलाई दर्शकले रुचाएका छन् । विशेषगरि, फिल्मको क्लाइमेक्सले दर्शकलाई रुवाएको छ । यस्तै, क्लाइमेक्सले दर्शकलाई सरप्राइज पनि दिएको छ । 

चन्द्र पन्तको निर्देशनमा तयार भएको फिल्ममा नेपाली तथा भारतीय कलाकारहरुको अभिनय छ । फिल्ममा हरिहर अधिकारी, नीता ढुंगाना, विपना थापा, किरण केसी, सरोज खनाल, संचिता लुइँटेल, प्रशान्त ताम्राकार, रेखा थापा, गरिमा शर्मा,  प्रदीप राउत, ब्रम्मानन्दम, सुनिल वर्मा, अली, आदर्श मिश्र लगायतका कलाकारहरुको अभिनय छ । 

फिल्मले भोलि शनिबार अझै आक्रामक कमाई गर्ने देखिएको छ । फिल्मले उत्साहजनक सुरुवात गरेपछि नायिका तथा निर्मात्री नीता ढुंगाना उत्साहित देखिइन् । उनले, दर्शकबाट उत्कृष्ट प्रतिक्रिया आएको भन्दै आफूहरूको मिहिनेत सफल भएको बताइन् ।