‘छक्का पन्जा’को नयाँ सिरिज २०८४ मा मात्र

यो बर्ष बक्स अफिसमा आक्रामक कमाई गरेको फिल्म ‘छक्का पन्जा ५’ सबै जसो हलबाट उत्रिएको छ । फिल्मका लेखक तथा कलाकार दीपकराज गिरीको आईएनआई नयाँ बाँनेश्वरमा मात्र यो फिल्मको एक शोज बाँकी छ । 

यो फिल्मले बक्स अफिसमा २० करोडको ग्रस कलेक्शन गर्न सफल भयो । यसअघि ‘छक्का पन्जा’का चारवटा सिरिजको भन्दा पाँचौ सिरिजले धेरै व्यापार गर्न सफल भयो । 

यो फिल्मले ब्लकबस्टर भएपछि दीपकराज गिरी र दीपाश्री निरौलाले नयाँ कुन फिल्म बनाउँछन् भन्ने चासो पनि छ । 

यो टिमले अब केही बर्ष ‘छक्का पन्जा’को सिरिज नबनाउने बताएको छ । फिल्मका लेखक, निर्माता तथा कलाकार दीपकराज गिरीका अनुसार, वि.सं २०८४ मा मात्र ‘छक्का पन्जा ६’ बन्नेछ । त्यो अघि विभिन्न विषयवस्तुमा नयाँ नाम राखेर फिल्म बनाउने तयारी दीपक–दीपाको छ । 

नेपाली बक्स अफिसमा अहिले नयाँ नयाँ निर्माताहरुको आगमन भइरहेको छ र फिल्मले नयाँ नयाँ रेकर्ड बनाइरहेका छन् । यसैले, देशकै चर्चित ब्यानर आमा सरस्वती मुभिजलाई पनि एक प्रकारको दबाब सिर्जना भएको छ । हेरौं, दीपक–दीपाले नयाँ फिल्म कस्तो कथा र कुन नाममा बनाउने हुन् ।