के समीरलाई ‘ए मेरो हजुर ५’बाट अफर गएको हो ?

केही समय अगाडिसम्म फिल्म ‘ए मेरो हजुर ५’ बन्ने चर्चा गमाएको थियो । तर, अहिले यो चर्चा सेलाएको छ । आउँदो वर्षलाई लक्षित गर्दै नयाँ बर्षमा फिल्म रिलिज गर्ने तयारीका साथ निर्माता सुनिल कुमार थापा र निर्देशक झरना थापा फिल्म बनाउन कस्सिएका थिए ।

तर, तिहार सकिएर अधिकांश फिल्मको छायांकन धमाधम सुरु हुँदा पनि यो फिल्मको चर्चा सेलाएको छ । 

वुझिएअनुसार, यो फिल्मका लागि नायक समीर भट्टलाई अफर गरिएको छ । समीरलाई फिल्ममा लिनका लागि निर्माणपक्ष लागिपरेको छ । यसका लागि विभिन्न च्यानलबाट उनीसँग कुराकानी अगाडि बढाइएको वुझिएको छ । 

केही दिन अगाडि मिडियाले यो बिषयमा प्रश्न गर्दा समीरले होइन भन्ने जवाफ दिएका थिए । उनले, यी सबै चर्चाहरु हल्ला मात्र भएको जवाफ दिए । 

तर, नायक अनमोल केसी र प्रदीप खड्कासँग कुरा अगाडि नबढेपछि सुनिलकुमार थापा समीरलाई लिनका लागि दौडधूप गरिरहेका छन् ।

फिल्म ‘१२ गाउँ’पछि समीरको चर्चा चुलिएको छ । यस्तो अवस्थामा समीरलाई छोरी सुहाना थापाको फिल्मी जोडी बनाउन निर्माता थापाले गरेको दौडधुपलाई सकारात्मक रुपमा हेर्न सकिन्छ ।