‘कार्साङ’मा जितुको यस्तो गेटअप

फिल्म ‘कार्साङ’को नयाँ पोस्टर रिलिज भएको छ । सार्वजनिक पोष्टरमा कलाकार जितु नेपाललाई मात्र देखाइएको छ । यो फिल्मका लागि जितुले निकै मिहिनेत गरेको उनको क्यारेक्टर पोस्टरमा पनि देख्न सकिन्छ । 

कालो टोपी, चेक, सर्ट, स्टकोट, कालो पाइन्ट र लेकमा लगाउने गमबुट लगाएका जितुले झोला घुँडामा अड्याएका छन् । उनको कचौरामा जाँड रहेको अनुमान लगाउन सकिन्छ ।

पोष्टरमा ‘मकै त पिन्ने घट्टामा, पिरती बस्यो ठट्टामा’ लेखिएको छ । पोस्टरको यो स्टेटमेन्टले उनी कसैको प्रेममा परेका हुन् कि भन्ने अनुमान लगाउन सकिन्छ ।

यम शेर्पाको डेब्यू लेखन तथा निर्देशनमा तयार भएको यो फिल्म पुसको २६ गतेबाट रिलिजमा आउँदैछ । शेर्पा समुदायको संस्कृतिमा आधारित रहेर तयार पारिएको यो फिल्ममा दयाहाङ राई, सिर्जना निङलेखु, जितु नेपाल, दीया मास्के, बुद्दि तामाङ, श्रृष्टी गौतम, डोमा हेल्मो, प्रेम लोप्चन, सुरवीर पण्डित लगायतका कलाकारहरूको अभिनय छ ।

यार्सा फिल्मस् र पुरुषोत्तम प्रधान फिल्मस्को प्रस्तुतिमा निर्माण भएको फिल्ममा पुरुषोत्तम प्रधान छायांकार र निर्माता स्वयंम हुन् । फिल्ममा सह–निर्मातामा गोविन्द बोहरा, कार्यकारी निर्माता आङछिरिङ शेर्पा तथा लाइन प्रोड्युसर वीरेन्द्र शाही हुन् ।