‘पूर्ण बहादुरको सारङ्गी’लाई सम्मान गर्दै ‘केटी हराएको सूचना’ पोष्टपोन्ड

कात्तिकको ३० गतेबाट रिलिजमा आउन लागेको फिल्म ‘मिसिङ केटी हराएको सूचना’को प्रदर्शन मिति पोष्टपोन्ड गरिएको छ । हाल प्रदर्शनरत फिल्म ‘पूर्ण बहादुरको सारङ्गी’को निर्माण टिमलाई बधाई दिँदै यो फिल्मको प्रदर्शन मिति पोष्टपोन्ड गरिएको जानकारी निर्माणपक्षले दिएको छ । 

‘पूर्ण बहादुरको सारङ्गी’ले दर्शकको अभूतपूर्व साथ पाइरहेको अवस्थामा नयाँ फिल्म आउँदा सिनेमा हलले नयाँ फिल्मलाई समेत शो बाँडफाँड गर्नुपर्ने अवस्थाको श्रृजना हुँदा दर्शकको साथ प्राप्त फिल्मलाई समेत असर पर्ने संभावना रहने भएकाले इतिहास कायम गर्ने बाटोमा रहेको फिल्मलाई सहज बनाइदिनु सबैको दायित्व भएको भन्दै ‘केटी हराएको सूचना’को प्रदर्शन मिति पोष्टपोन्ड गरिएको हो । 

दीपेन्द्र गौचनको निर्देशनमा तयार भएको यो फिल्मको टिजर, ट्रेलर र गीत सार्वजनिक भइसकेको छ । तर, दोस्रो सातामा पनि ‘पूर्ण बहादुरको सारङ्गी’को व्यापार अझै बढिरहेको छ ।

यही अवस्थालाई मध्यनजर राख्दै नाजिर हुसेन र श्रृष्टी श्रेष्ठको मुख्य भूमिका रहेको फिल्मको प्रदर्शन मिति पोष्टपोन्ड गरिएको हो ।