‘तेल भिसा’को ट्रेलरः विदेशिएका सन्तान र बाबु–आमाको कथा

मंसिरको ७ गतेबाट रिलिजमा आउन लागेको फिल्म ‘तेल भिसा’को ट्रेलर सार्वजनिक गरिएको छ । काठमाडौंमा आयोजना गरिएको पत्रकार सम्मेलनमा बाबु–आमा र सन्तानको कथा देखाउने फिल्मको ट्रेलर रिलिज गरिएको हो । 

नायिका ऋचा घिमिरेको प्रस्तुतिमा तयार भएको यो फिल्ममा विपिन कार्की, वर्षा राउत, पुजा चन्द, ऋचा घिमिरे, वुद्दि तामाङ, सुचित्रा उप्रेती लगायतका कलाकारहरुको अभिनय छ । 

फिल्ममा शंकर घिमिरेको लेखन तथा निर्देशन, अनिल पाण्डे र शिवराज कार्कीको लगानी छ । सुशन प्रजापतिको छायांकन रहेको फिल्ममा अन्जय खड्काको सम्पादन, रामजी लामिछानेको कोरियोग्राफी, आशिष अविरल, कल्याण सिंह र कृष्ण भारद्वाजको संगीत छ । 

यो फिल्मको ट्रेलरमा अमेरिका पुगेको छोरा, बाबु र आमाको पीडाको कथा छ । यस्तै, अमेरिका पुगेका श्रीमान् र श्रीमतीबिचको सम्बन्धमा आउने उतारचढावको कथा पनि फिल्ममा छ । अमेरिका पुगेकी आमाले भोगेको जेल जीवनको कथालाई पनि फिल्ममा प्रस्तुत गरिएको छ । 

फिल्ममा विपिन कार्की बाबु र छोराको भूमिकामा छन् । यो फिल्मले पनि दर्शकको मन छुने विश्वास गरिएको छ । फिल्मकी निर्मात्री तथा कलाकार ऋचा घिमिरेले अघिल्ला फिल्मबाट थुप्रै पाठ सिकेर यो फिल्मको कथा मिहिनेत गरेको सुनाइन् ।