‘ह्रस्व दीर्घ’बाट आशावादी छिन् गरिमा

डेब्यू फिल्म ‘लण्डन टू पेरिस’बाट करिअरलाई कुनै पनि तरिकाले फाइदा नभएपछि नायिका गरिमा शर्मा चिन्तित देखिइन् । यो फिल्ममा उनले गरेको अभिनयको पनि आलोचना भयो । 

यो फिल्म असफल भएपछि गरिमाको करिअर कसरी अगाडि बढ्छ भन्ने टिप्पणी पनि भइरहेका छन् । यही बिचमा उनले अभिनय गरेको अर्को फिल्म ‘ह्रस्व दीर्घ’ कात्तिकको ३० गतेबाट रिलिजमा आउँदैछ । 

उसो त यो फिल्ममा गरिमा मुख्य नायिका होइनन् । तर, फिल्मको ट्रेलर हेर्दा कथावस्तुमा उनको भूमिका महत्वपूर्ण रहेको विश्लेषण गर्न सकिन्छ ।

फिल्मका मुख्य नायक हरिहर अधिकारीसँग जोडिएकाले पनि गरिमाको भूमिका विशेष हुने देखिन्छ । 

गरिमालाई यो फिल्मबाट करिअरमा ठूलै फाइदा पुग्ने विश्वास छ । फिल्मको ट्रेलर रिलिज भएपछि उनले पहिलो फिल्ममा गरेको गल्ती सुधारेको टिप्पणी गर्न सकिन्छ । 

गरिमा पनि यो फिल्ममा दर्शकले आफ्नो कामलाई मन पराउनेमा आशावादी छिन् । फिल्ममा कलाकारहरुको लाइनअप लामो मात्र होइन बलियो पनि छ । यसैले, नेपाली र भारतीय सशक्त कलाकारहरुको भीडमा आफूलाई उम्दा देखाउनु गरिमाका लागि चुनौती हो । गरिमा यसमा आफू सफल हुनेमा विश्वस्त छिन् ।