नेपाल आउँदै बलिउड नायिका उर्वशी

बलिउड नायिका उर्वशी रौटेला नेपाल आउने भएकी छिन् । डिसेम्बर १४ मा होटल याक एण्ड यतीमा आयोजना हुन लागेको ‘ग्ल्याम नेपाल इन्टरनेशनल २०२४’मा सो स्टपरको रुपमा सहभागी हुन रौटेला नेपाल आउन लागेकी हुन् । 

यो फेसन शोमा सहभागिताका लागि मोडलको आवेदन खुल्ला गरिएको छ । आयोजक प्रारम्भ प्रोडक्सनले बुधबार एक बिज्ञप्ती जारी गर्दै मोडलका लागि आवेदन खुल्ला भएको जानकारी दिएको हो । 

शोमा सहभागी हुन चाहने मोडलले इसेवा एप मार्फत आवेदन फर्म भर्न सक्नेछन् । शोमा सहभागी मोडलहरुमा महिलाका लागि ५.४ फिट र पुरुषका लागि ५.१० फिट हाइट माथि हुनुपर्ने प्रावधान छ ।

शोका लागि मोडल छनौट अडिसन ९ नोभेम्बरमा होटल हिमालयनमा आयोजना हुनेछ । जसबाट ६ पुरुष र २४ महिला गरेर ३० मोडल छानिने आयोजक प्रारम्भ प्रोडक्सनका फाउन्डर निर्देशक पवन आचार्यले जानकारी दिए ।

नेपालका उत्कृष्ट डिजाइनरहरूले तयार पारेको आकर्षक र नयाँ फेसनका डिजाइनहरु फेसन शोमा विभिन्न सिक्वेन्समा प्रस्तुत हुनेछ । फेसन शोमा व्यवसायी, कलाकार, मोडल लगायतका विभिन्न ब्यक्तिहरुको सहभागिता रहनेछ । 

शोको उत्कृष्ट मोडल तथा डिजाइनरले अष्ट्रेलियामा हुने ग्ल्याम इन्टरनेशनलमा सहभागीको अवसर प्राप्त गर्नेछन् ।