‘कल्ली’मा उत्तम प्रधानको इन्ट्री

रेड बर्ड प्रोडक्सन र कस्तूरी प्रोडक्सनको व्यानरमा निर्माण हुन लागेको फिल्म ‘कल्ली’मा नायक उत्तम प्रधानको प्रवेश भएको छ । उत्तम लामो समयपछि नेपाली फिल्ममा कमब्याक गर्न लागेका हुन् । उनले केही समय अगाडि निरुता सिंहसँग म्युजिक भिडियोमा काम गरेका थिए ।

फिल्म ‘दर्पणछायाँ २’ मा विशेष भूमिकामा काम गरेपछि उत्तमले नयाँ फिल्ममा काम गरेका थिएनन् । फिल्ममा सौगात मल्ल, अर्पण थापा, वुद्दि तामाङ, कमलमणि नेपाल र बेनिशा हमालले काम गर्ने पक्का भएको छ ।

फिल्मका निर्माता किरण नेपाली र लेखक तथा  निर्देशक लक्ष्मण सुनारले सिक्किम पुगेर कलाकार प्रधानलाई अनुबन्धित गरेका हुन् । प्रधानले लामो समयपछि नेपाली फिल्ममा कमब्याक गर्न पाउँदा आफू उत्साहित भएको प्रतिक्रिया दिएका छन् । फिल्ममा उनको भूमिका के हो भन्ने केही पनि खुलाइएको छैन । 

फिल्ममा महेश दवाडीको पटकथा तथा संवाद छ । यो फिल्मलाई नयाँ बर्षको छेको पारेर चैत्रको २९ गतेबाट रिलिज गर्ने तयारी निर्माणपक्षको छ । फिल्मको छायांकन कर्णाली प्रदेशका विभिन्न रमणीय स्थानमा गर्ने तयारी भइरहेको निर्माणपक्षले बताएको छ ।