‘पूर्ण बहादुरको सारङ्गी’को टिकट छैन

यो बर्षको तिहारमा रिलिज भएको नेपाली फिल्म ‘पूर्ण बहादुरको सारङ्गी’ले बक्स अफिसमा बिष्फोटक व्यापार गरिरहेको छ । बिहिबारदेखि रिलिजमा आएको फिल्मको व्यापार आइतबारदेखि आक्रामक रुपमा अगाडि बढेको हो । योसँगै फिल्मले मल्टिप्लेक्स हलमा उल्लेख्य शोज समेत पाइरहेको छ । 

बिहिबार रिलिजको दिन दुई हिन्दी फिल्मका कारण शोजमा समस्या परे पनि सोमबारदेखि भने फिल्मको व्यापार आक्रामक देखिएको छ । योसँगै हलहरुले शोजमा पनि उल्लेख्य वृद्धि गरेका छन् । 

यो फिल्मको टिकट पाउन दर्शकलाई मुश्किल परिरहेको छ । भोलि बुधबारका लागि अग्रिम टिकट बूकिङ आक्रामक छ । आज देशभरका सबै जसो हलमा टिकट पाउन मुश्किल देखिएको छ । फिल्मलाई रातको ११ बजेसम्म हलहरुले शोज दिएका छन् । 

तिहारमा रिलिजमा आएका दुई ठूला बलिउड फिल्म पछि परेका छन् । सरोज पौडेलको लेखन तथा निर्देशनमा तयार भएको फिल्ममा विजय बराल, मुकुन भुसाल, प्रकाश सपुत, अन्जना बराइली लगायतका कलाकारहरूको अभिनय छ । 

फिल्मले दर्शकबाट उत्कृष्ट प्रतिक्रिया पाएपछि बक्स अफिसमा त्यसको  उछाल देखिएको हो । विनोद पौडेल र प्याट्रिक सुवेदी फिल्मका निर्माता हुन् ।