‘अग्निदहन’को रमाइलो गीत 'दाइ दाइ नभन मलाई'

फिल्म ‘अग्निदहन’को 'दाइ दाइ नभन मलाई'बोलको नयाँ गीत सार्वजनिक भएको छ । पार्वती जिसी र तुलसी क्षेत्रीको स्वर, परशुराम अधिकारीको संगीत, लोकमणि पौडेलको रचना रहेको फिल्मको गीत शनिबार सार्वजनिक गरिएको हो । 

विवाहको सेटअपमा तयार रत्यौली खेल्दै गाइने झ्याउरे पाराको गीतको भिडियोमा अनुपमा भण्डारी, प्रमिला तुलाचन, रमा त्रिपाठी, सनिशा भट्टराई, तुलसी क्षेत्री, सरला कुमारी पाण्डे, प्रसिना आचार्य लगायत फिचर्ड छन् । भिडियोलाई धर्मेन्द्र पौडेलले केरियोग्राफी गरेका हुन् । 

साहित्यकार तथा पत्रकार लोकमणि पौडेलको उपन्यास ‘अग्निदहन’ मा आधारित रहेर निर्माण गरिएको फिल्म बोक्सीको अन्धविश्वासविरुद्ध निर्माण गरिएको छ । फिल्म आगामी मंसिर ७ गते रिलिज हुँदैछ ।  

घनश्याम लामिछानेको निर्देशन रहेको यो फिल्म मैथिली र भोजपुरी भाषामा समेत डबिङ गरिएको छ । निर्माणपक्षका अनुसार फिल्म अंग्रेजी भाषामा पनि सबटाइटल गरिएको छ ।

फिल्ममा लोकमणि पौडेलको कथा, पटकथा र संवाद, कोविदशरण उपाध्यायको परिकल्पना, परिच्छेद सेनको मुख्य सहायक निर्देशन, शंकर पाण्डेको प्रोडक्सन डिजाइन, दीर्घ गुरुङको छायांकन, दीर्घ खड्काको सम्पादन, राजेन्द्र मोक्तानको रंग संयोजन छ ।

चलचित्र विकास बोर्डले ‘विशेष चलचित्र अवार्ड’ दिइसकेको यो फिल्मलाई निवर्तमान राष्ट्रपति विद्यादेवी भण्डारी, प्रधानमन्त्री केपी शर्मा ओली, निवर्तमान प्रधानमन्त्री पुष्पकमल दाहालले हेरिसकेका छन् । 

फिल्ममा प्रकाश घिमिरे, प्रमिला तुलाचन, माओत्से गुरुङ, अनुपमा भण्डारी, तुलसी क्षेत्री, विष्णु वास्तोला, ताराबहादुर गुरुङको अभिनय छ ।