पूजा चन्द र राज वल्लभको 'रमाइलो तिहार'

गायक प्रताप दासको स्वर र रमेश क्षेत्रीको संगीतमा नयाँ गीत 'रमाइलो तिहार' सार्वजनिक गरिएको छ । अमेरिकामा नै छायांकन गरिएको यो गीतको भिडियोमा पूजा चन्द, राज वल्लभ कोइराला, समीर रेग्मी, आकृति काफ्ले, मनोरथ खनाल, आकाश खतिवडा, दिलिप श्रेष्ठ, अपार श्रेष्ठलगायतका कलाकारहरु फिचर्ड छन् ।   

गीतले विदेशमा रहेका नेपालीहरूको संस्कृतिक, पारिवारिक सम्बन्ध, र चाडपर्वमा घरको सम्झना झल्काउँछ। लामो समयदेखि विदेशमा रहेका भाइको निधारमा सप्तरङ्गी टिका र मखमली माला लगाइ दिर्घायुको कामना गर्न नेपालबाट अमेरिका पुगेकी दिदीको यात्रा र भाइसँगको आत्मीयता गीतमा प्रस्तुत छ । 

निर्देशक जोयस पाण्डेले निर्देशन गरेको यो गीतलाई अमेरिकामा ह्यप्पी होम स्टुडियोजको निर्माणमा तयार गरिएको छ । समीर रेग्मीलाई गीतमा नेपाली कला र संस्कृति प्रति समर्पित पात्रको रूपमा देखाइएको छ। ताइवानका चिनइन गावोले छायांकन गरेको भिडियोलाई निशान घिमिरेले सम्पादन गरेका हुन् ।