‘पूर्ण बहादुरको सारङ्गी’को ‘रैया चाँदीको’मा ‘दोहोरी ब्याटल’

यही कात्तिक १५ गते प्रदर्शनको तयारी गरेको फिल्म ‘पूर्ण बहादुरको सारङ्गी’को नयाँ गीत ‘रैया चाँदीको’ सार्वजनिक गरिएको छ । बिहीबार सार्वजनिक गरेको यो गीतमा ‘दोहोरी ब्याटल’ देख्न सकिन्छ । 

आशिष अविरल र मेलिना राइको स्वर समावेश गरिएको यो गीतमा नवराज पन्तको शब्दरचना र आशिष स्वयंको संगीत रहेको छ । यो गीतको भिडियोमा फिल्मका मुख्य कलाकार विजय बराल, मुकुन भुसाल, बुद्धि तामाङ, अञ्जना बराइली फिचर्ड छन् ।

यो गीतको ब्याटलमा महिला र पुरुषका दुई टिम छन् । ब्याटल महिलाले राखेको सर्तसहित सुरु गरिएको छ । महिला टिमले जिते अन्जना बराइलीको घरमा विजय बराल हली बस्नुपर्ने र पुरुष टिमले जिते विजयसँग अञ्जनाले बिहे गर्नुपर्ने सर्त छ । 

सेभेन सिज सिनेमा र बासुरी फिल्मसको प्रस्तुति रहेको यो फिल्मको निर्माता विनोद पौडेल र प्याट्रिक सुवेदी हुन्, भने कार्यकारी निर्माता रमेश चौलागाईं, हरि श्रेष्ठ, र रमेश ढकाल हुन् । 

गन्धर्व समुदायको जीवन र सामाजिक कथावस्तुमा इर्माण गरिएको फिल्ममा प्रशान्त शिवाकोटीको संगीत, हेमन्त कान्छा रसाइलीको सारङ्गी र प्रशान्त शिवाकोटी, मेलिना राई, तथा पुष्पन प्रधानको स्वर रहेको छ । फिल्मको संवाद महेश दवाडीले लेखेका हुन् ।

सरोज पौडेलको कथा तथा निर्देशन रहेको फिल्ममा विजय बराल, मुकुन भुसाल, अञ्जना बराइली, प्रकाश सपूत, बुद्धि तामाङ, माओत्से गुरुङ, देशभक्त खनाल, भोलाराज सापकोटा, विनोद न्यौपाने, अलिसा बास्तोला, स्वायम् केसी, जान्वी पौडेललगायतको अभिनय छ ।