चन्द्रले यसरी गर्दैछन् ‘नरसिंहाः अवतार’मा एक्सनको कोरियोग्राफी

नायक राजेश हमालको कमब्याक फिल्म ‘नरसिंहाः अवतार’ चर्चामा छ । यो फिल्मको घोषणा भएसँगै यसले दर्शकमाझ एउटा तरंग पैदा गर्न सफल छ । 

यो फिल्ममा नायक हमालको एक्सन अवतार पनि बेजोड देखिने अपेक्षा आम दर्शकले गरेका छन् । यो फिल्ममा चन्द्र पन्तले एक्सन कोरियोग्राफी गरिरहेका छन् । ८ बर्षपछि चन्द्रले नेपाली फिल्ममा फेरि एक्सनको कोरियोग्राफी गरेका हुन् । उनले, फिल्म ‘ह्रस्व दीर्घ’को निर्देशन समेत  गरिसकेका छन् । 

बालाजुमा रहेको एनएफडीसी स्टूडियोमा सेट लगाएर फिल्मको एक्सन दृश्यको छायांकन भइरहेको छ । फिल्मको क्लाइमेक्सको एक्सन खिच्दै छायांकन अगाडि बढाइएको हो । 


दिवाकर भट्टराइको निर्देशनमा तयार भइरहेको फिल्ममा राजेश हमालसँगै नीर शाह, सरोज खनाल, नीति शाह, राज कटुवाल, प्रशान्त ताम्राकार, सनिषा भट्टराई, रमेश चन्द सोडारी, प्रकाश कुँवर लगायतका कलाकारहरुको अभिनय छ । 

एक्सन निर्देशक चन्द्रले ८ बर्ष अगाडि दिवाकरकै निर्देशनमा बनेको फिल्म ‘क्याप्टेन’बाट एक्सनको कोरियोग्राफी गरेका थिए । 

क्रियटिभ सिने आर्टको प्रस्तुतिमा तयार भइरहेको यो फिल्ममा नरेन्द्र महर्जन, पर्शुराम बस्नेत र ध्रुब न्यौपानेको लगानी छ । फिल्मलाई एप्पल इन्टरटेन्मेन्ट, एफडी कम्पनी र रिच इन्टरटेन्मेन्टले वितरण गर्दैछन् ।