‘सानो संसार’को प्रदर्शन स्थगित, अब कहिले हुन्छ रि-रिलिज ?

शुक्रबारबाट सार्वजनिक प्रदर्शनमा आएको फिल्म 'सानो संसारको'को रिलिज स्थगित गरिएको छ। अविरल परेको पानी र झरीका कारण दर्शक हलमा पुग्न कठिन भएको भन्दै निर्माता अर्जुन कुमारले यो फिल्मको रिलिज स्थगित गरेको बताएका छन् ।

यो फिल्मका निर्माता अर्जुन कुमार र माधव वाग्लेले एक विज्ञप्ति जारी गर्दै बाढीपहिरो र प्राकृतिक विपत्तिले मानिसलाई आवतजावत गर्न समेत कठिन भएकाले यो निर्णय लिएको बताए । जारी विज्ञप्तिमा जनधनको सुरक्षालाई पहिलो प्राथमिकतामा राख्दै केही समयको लागि प्रदर्शन रोक्ने निर्णय गरिएको उल्लेख गरेका छन् ।   

हाललाई स्थगित गरिएको यो फिल्मको अब उपयुक्त समय हेरेर नयाँ डेट सहित पुनः रिलिज गर्ने निर्माता अर्जुन कुमारको तयारी छ । उनका अनुसार मौसमले साथ दिएको खण्डमा अब चाडै नै यो फिल्म रिलिज हुनेछ । 

सिद्धार्थ पुडासैनीले निर्देशन गरेको यो फिल्मको कार्यकारी निर्मातामा माधव वाग्ले छन् । फिल्ममा सरिष्मा खत्री र निर्देशक पुडासैनीको लेखन छ । फिल्ममा प्रवीन खड्काको छायांकन तथा रोमी मोसेस तन्डुकारको सम्पादन छ । निर्देशक पुडासैनीको यो देब्यु निर्देशन हो ।  

फिल्ममा सीतादेवी तिमल्सेनाको अलावा राजपंगेनी शर्मा, अनु दाहाल, अञ्जसा रिजाल, शिशिर शिवाकोटी, सरिता भण्डारी र जीवन गौतमलगायतका कलाकारहरुको अभिनय रहेको छ ।