‘एक्टर: टेक वन’को रोमान्टिक टिजर

कार्तिक १५ गते लक्ष्मी पूजाबाट प्रदर्शन हुने फिल्म ‘एक्टर: टेक वन’ को टिजर सार्वजनिक गरिएको छ । फिल्म रिलिज मिती नजिकिदै गर्दा निर्माण टिमले शुक्रबार फिल्मको टिजर सार्वजनिक गरेको हो। 

सार्वजनिक फिल्मको टिजरमा नायक प्रदिप खड्काका विभिन्न चरित्रहरूलाई प्रस्तुत गरिएको छ भने अभिनेता राजबल्लभ कोइराको इन्ट्री लुक्स बब्बाल छ। १ मिनेट २० सेकेन्ड लामो टिजरमा आना शर्मा, दिव्या रायमाझी र प्रदिप खड्का रोमान्टिक अवतारमा प्रस्तुत छन् । 

अभिनेता राजबल्लभ कोइरालाले यसपटक आफ्नो अघिल्लो भूमिकाहरू भन्दा फरक र आधुनिक शैलीको चरित्र निभाएका छन् । उनी यो फिल्म मार्फत १० वर्षपछि अभिनयमा कमब्याक गरेका हुन् ।  टिजरमा दिव्या रायमाझीलाई ‘बोल्ड एन्ड ब्यूटिफूल’ रूपमा प्रस्तुत गरिएको छ। दिव्या नेपाली फिल्मका चर्चित अभिनेता दिलिप रायमाझीकी छोरी हुन्। उनको यो डेब्यु फिल्म हो। 

यो फिल्ममा नरेन्द्र मैनालीको छायांकन, निमेश श्रेष्ठको सम्पादन, राजेन्द्र मोक्तानको रंग संयोजन, र पोस्ट-प्रोडक्सन सुपरभाइजर साहिल खान रहेका छन् । हर्कुलस बस्नेत, रोहित शाक्य, र एलिस कार्कीको संगीत, शिशिर खाती र किरण थापाको कोरियोग्राफी रहेको फिल्मको द्वन्द्व निर्देशन अष्ट महर्जन हुन् ।

अदृत फिल्मस् र मोती फिल्मस्‌को संयुक्त प्रस्तुति रहेको फिल्मका निर्माता थमन कुमार भण्डारी हुन् । अनिश भुसाल सह-निर्माता र क्रियटिभ प्रोड्युसर मोती कार्की रहेको फिल्मको स्क्रिप्ट आकाश बराल र राजन भुसालले संयुक्त रूपमा लेखेका हुन्।

राजन भुसालले निर्देशन गरेको यो फिल्ममा प्रदिप, आना, र दिव्याका साथ राजबल्लभ कोइराला, दिव्य देव, उषा रजक र सुशील सिटौलालगायतको प्रमुख अभिनय छ ।