२५ डिसेम्बरमा ब्याण्डसहित सोनु निगमले काठमाडौंमा लाइभ कन्सर्ट गर्ने

भारतका लोकप्रिय पार्श्व गायक तथा संगीतकार सोनु निगमले नेपालमा सांगीतिक प्रस्तुति दिने भएका छन् । आगामी क्रिसमसको अवसर पारेर पुस १० अर्थात २५ डिसेम्बरमा काठमाडौंमा उनले एकल प्रस्तुति दिन लागेका हुन् ।

यसअघि विराटनगरमा नेपथ्यको कन्सर्ट आयोजना गरेको इभेन्ट म्यानेजमेन्ट कम्पनी नेपाल टचले निगमलाई नेपाल ल्याउन लागेको हो । यो कम्पनीले अस्ट्रेलियामा भ्वाइस अफ नेपाल र नेपाल आइडलको सांगीतिक टुरलगायतका थुप्रै इभेन्तहरु गरिसकेको छ । 

सन् २००४ मा झरना ब्रजाचार्यसँग ‘लभ इन नेपाल’ नामक फिल्ममा अभिनय गरेका गायक निगमको यो दोस्रो सांगीतिक प्रस्तुति हो । निगमले दुई दशकअघि काठमाडौंमा आयोजित एक समारोहमा प्रस्तुति दिइसकेका छन्  । 

गायक निगमले यो पटक नेपालमा आफ्नो ब्याण्डसहित सोलो पर्फमेन्स गर्ने छन् । नेपाल टचका अनुसार अब छिट्टै नै टिकट बुकिङ खुलाइने छ ।