एक्सन थ्रिलर फिल्म 'डिएनए'को टिजर रिलिज

पौराणिक एक्सन थ्रिलर जनराको फिल्म 'डिएनए'को टिजर रिलिज गरिएको छ । केही समय अगाडि घोषणा गरिएको यो फिल्मको टिजरमा नव अभिनेता सुधन पोखरेल एक्सन अवतारमा प्रस्तुत छन् । 

छायांकन अगाडि नै रिलिज गरिएको फिल्मको ‘अनाउन्समेन्ट टिजर’मा सुधन एक व्यक्तिले रक्षा गर्न सङ्घर्ष गरिरहेको एक रहस्यमय बाकसबाट निस्किरहेको अनौठो प्रकाश देखेपछि अचम्मित भावमा देखिन्छन्।  उक्त बाकसबाट निस्किएको प्रकाश कुनै पौराणिक वस्तुको प्रतीकको रूपमा प्रस्तुत गरिएको छ। पौराणिक कथाको आधुनिक अनुकूलनमा आधारित यस थ्रिलर फिल्ममा सुधनसँगै दिपक केसी र चिरायु पौडेललगायतका कलाकारहरू छन् । 

चानस पुन मगर र मणि रत्न त्रिपाठीले संयुक्त रूपमा लेखन र निर्देशन गर्ने फिल्मको छायांकन आउँदो फागुन महिनाबाट सुरु हुनेछ। फोनिक फ्लिकले निर्माण गर्ने फिल्ममा बड पिक्चर्स र अन्डर एक्सपोज सिनेमासँगको सहकार्य रहनेछ ।

यो फिल्ममा सुशान्त केसी र प्रशान्त योगीको छायांकन, राजु तामाङको एक्सन निर्देशन, मानस्वी मालाकारको सङ्गीत, चिरायु पौडेलको मुख्य सहायक निर्देशन, गणेश क्षेत्रीको सम्पादन रहेको यो फिल्मको निर्माता कुमार भास्कर हुन् भने एसोसियट निर्माता आशिष पुडासैनी र कार्यकारी निर्माता बिकाश भण्डारी हुन् ।