नाजिर र सृष्टिको ‘केटी हराएको सूचना’को पहिलो गीत ‘हेर्दै जाउँ’

आगामी कात्तिक ३० गतेबाट प्रदर्शनमा आउने तयारीमा रहेको फिल्म ‘मिसिङ : केटी हराएको सूचना’को पहिलो गीत सार्वजनिक गरिएको छ । यो फिल्मको आइतबार ‘हेर्दै जाउँ’ बोलको गीत सार्वजनिक गरिएको हो । 

निर्देशक गौचन शब्द रचना तथा संगीत रहेको यो गीतमा रोहित जोन क्षेत्री र शितुसित बस्नेतको स्वर छ । सार्वजनिक यो गीतको भिडियोमा फिल्मको मुख्य कलाकार नाजिर हुसेन र सृष्टि श्रेष्ठ फिचर्ड छन् । यो गीतको भिडियोलाई राजीव कर्णले कोरियोग्राफि गरेका हुन् ।

यो फिल्मको यसअगाडि टिजर सार्वजनिक गरिएको थियो । टिजरमा नाजिरले सृष्टिलाई ह्विलचियरमा हात-खुट्टा बाँधेर बन्धक बनाएका थिए। त्यस्तै, यो फिल्मको गीतमा यी दुइको प्रेमभाव प्रस्तुत छ । 

निर्देशक दीपेन्द्र गौचनको लेखन, निर्देशन र निर्माण रहेको यो फिल्ममा नाजिर र सृष्टिसहित सञ्जय गुप्ता, राम नारायण ठाकुर, मदन ठाकुर, रिना रिमाल, सुदीप पटेल, अर्जुन पोखरेल, ललिता देवी मिश्र लगायतको अभिनय छ । नकिम उद्दिन कार्यकारी निर्माता रहेको फिल्ममा अमर महर्जनको छायांकन, निमेष श्रेष्ठको सम्पादन तथा शंकर महर्जनको द्वन्द्व निर्देशन छ ।

३२ वर्षअघि डकु-ड्रामा ‘उजेली’ निर्देशन गरेका दीपेन्द्र गौचनको यो पहिलो निर्देशकीय फिल्म हो ।