‘आँखा’ ट्रेलरमा सुकुम्बासीको कथा

आगामी शुक्रबार अर्थात यही असोज ११ गतेबाट प्रदर्शन हुने फिल्म ‘आँखा’को ट्रेलर सार्वजनिक भएको छ । यो फिल्म प्रदर्शन हुन ५ दिन बाँकी रहँदा निर्माणपक्षले आइतबार ट्रेलर सार्वजनिक गरेको हो । 

सार्वजनिक यो फिल्मको ट्रेलरमा सुकुम्बासी बस्तीमा बस्दै आएको एक दम्पतीले जीवन चलाउन गरेको संघर्ष र दुःखको कथालाई प्रस्तुत गरेको छ । यो फिल्मको मुख्य पात्र स्मिता लामिछाने र आरके मेहतालाई ट्रेलरमा दम्पतीको भूमिकामा देख्न सकिन्छ । 

ढाका टोपी फिल्मस्, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा तयार भएको फिल्ममा नारायणप्रसाद बराल कार्यकारी निर्माता, रेनुका कार्की ढोली सह-निर्माता तथा राम बस्नेत लाइन प्रोड्यूसरमा छन् । 

जौन योन्जनको लेखन तथा निर्देशन रहेको फिल्ममा स्मिता र आरकेसहित निशा अधिकारी, सरोज खनाल, पशुपति राई, प्रवीण खतिवडा, विजय बराल, बुद्धि तामाङ, कृष्णभक्त महर्जन, राजन खतिवडा, लुनिभा तुलाधर, रविन्द्र झा, अभयराज बराल र बाल कलाकार प्रसन राई पनि मुख्य भूमिकामा छन् । 

अलोक शुक्लाको छायांकन रहेको फिल्मको निर्माता निर्देशक योन्जन आफैं हुन् । कृष्ण भण्डारी र निर्देशक योन्जनको सम्पादन रहेको फिल्मको गीतमा दीपक आरजे र जयन जे वाइवाको संगीत छ । यो फिल्मलाई आरआर फिल्मस्ले वितरण गर्नेछ ।