‘खुस्मा’को ट्रेलरमा आफ्नो मान्छे हराउँदाको पीडा

असोजको ३ गतेबाट रिलिजमा आउन लागेको फिल्म ‘खुस्मा’को मन छुने ट्रेलर रिलिज भएको छ । अशोक थापा मगरको निर्देशनमा तयार भएको यो फिल्मको ट्रेलरमा प्रेम, विछोडको कथा छ । 

फिल्ममा धिरज मगर, उपासना सिंह ठकुरी, माओत्से गुरुङ, राज थापा काउचा, विजय सुब्बा, अरुण मगर लगायतका कलाकारहरुको अभिनय छ । 

सार्वजनिक ट्रेलरमा धिरज र उपासना बीचको प्रेम, विवाह, परिवारको सदस्य हराउँदाको पीडालाई प्रस्तुत गरिएको छ । जनयुद्धकालमा फर्किएको एक जोडीको प्रेमकथामा यो फिल्म निर्माण भएको हो । 

वीर बहादुर लामा, चन्द्र भट्टचन, वेतानी मगर, मानबहादुर मगरको लगानी रहेको फिल्ममा सुस्मिता वुढाथोकी सह–निर्माताको रुपमा छिन् । फिल्ममा अशोक थापा मगरको कथा तथा पटकथा, दीपक बज्राचार्यको छायांकन, अशोक थापा मगरको सम्पादन, एसडी योगी, पार्क चान्जी र सरिता राईको संगीत छ । 

सुरेन्द्र राई, शेखर घर्ती मगर र सुसन लामाको कोरियोग्राफी रहेको फिल्म असोजको ३ गतेबाट रिलिजमा आउँदैछ ।