दया र मिरुनाको ‘घर ज्वाँई’ले मनायो ५१ दिन

आधा दर्जन बढी हलमा ५१ दिन मनाएको फिल्म ‘घर ज्वाँई’को निर्माण टिमले शनिबार एक कार्यक्रमको आयोजना गर्यो । उप–सभामुख इन्दिरा घिमिरेलाई प्रमुख अतिथि बनाउँदै आयोजित सेलिब्रेशन कार्यक्रममा फिल्मको टिमले केक काट्यो । यस्तै, फिल्मसँग जोडिएका प्राविधिक, कलाकारहरूलाई मायाको चिनो वितरण गरिएको थियो । 

अनिल बुढामगरको लेखन तथा निर्देशनमा तयार भएको यो फिल्ममा जनक घर्ती मगरको लगानी छ । यो फिल्म असारको २८ गतेबाट देशव्यापी प्रदर्शनमा आएको थियो । 

फिल्मले बक्स अफिसमा करिब ६ करोडको ग्रस कलेक्शन गरेको वुझिएको छ । २ करोडको बजेटमा तयार भएको फिल्मबाट निर्माताले १ करोड बढी मुनाफा कमाएको वुझिएको छ । 

नेपालबाट शेयर, डिजिटल राइट्स र ओभरसिज राइट्सबाट फिल्मका निर्माताले १ करोड बढी मुनाफा कमाएका हुन् । यो फिल्ममा दयाहाङ राई, मिरुना मगर, बुद्धि तामाङ, शिशिर वाङ्देल लगायतका कलाकारहरुको अभिनय छ ।