‘जेरीः अन टप’मा जोडिए साईग्रेस

कथा वाचकको रुपमा चर्चित रहेका साईग्रेस पोखरेल अब फिल्म ‘जेरीः अन टप’मा जोडिएका छन् । फिल्मको निर्माण टिम र साईग्रेसबिच बिहिबार कागजी संझौता भएको छ । 

फिल्मका निर्माता सरोज न्यौपानेले साईग्रेसले अब फिल्मको कथालाई अझै मजबुत बनाउने बताए । उनले भने–‘उहाँले अब हाम्रो स्क्रिप्टलाई अझै परिमार्जित र मजबुत बनाउनुहुनेछ । उहाँलाई स्क्रिप्ट डाक्टर त भनिहाल्न मिल्दैन । तर, उहाँ जस्तो व्यक्तिले हाम्रो स्क्रिप्टमा आफ्नो क्रियशन थप्दा अझै उत्कृष्ट हुनेछ भन्ने विश्वासमा छौं ।’

सुयोग गुरुङको निर्देशनमा बन्न लागेको यो फिल्मको छायांकन असोजबाट सुरु हुनेछ । फिल्मलाई काठमाडौं, लुक्ला र लद्दाखमा खिच्ने तयारी गरिएको छ । 
फिल्ममा नायक अनमोल केसी, नायिकाद्धय आँचल शर्मा र जसिता गुरुङको मुख्य भूमिका रहनेछ । 

फिल्ममा जोडिन पाउँदा साईग्रेस पनि निकै खुशी छन् । उनले, फिल्मका नायक अनमोल केसीलाई पनि फलो गर्दै आएका थिए । यसैले, अनमोल पनि साईग्रेस फिल्ममा जोडिँदा उत्साहित देखिएका छन् । 

यो फिल्मलाई फागुनको २ गतेबाट रिलिज गर्ने घोषणा निर्माणपक्षले गरिसकेको छ ।