‘एक्टरः टेक वान’को पोष्टरमा घाइते प्रदीप

फिल्म ‘एक्टर: टेक वान’को पहिलो पोस्टरले सर्वाधिक आलोचना भोग्यो । पहिलो पोस्टर आलोचित भएपछि तनावमा रहेको यसको निर्माणपक्षले दोस्रो पोस्टर भने आकर्षक निकालेको छ । सार्वजनिक पोष्टरमा मुख्य नायक प्रदीप खड्कालाई देख्न सकिन्छ ।

लामो कपालमा रहेका उनको अनुहारभरी घाउ चोट लागेको छ । अनुहारमा आलो रगत छ । यसले, उनीमाथि कसैले आक्रमण गरेको हो कि भन्ने अनुभुती दिलाउँछ । कात्तिकको १५ गते लक्ष्मीपूजाको दिनबाट रिलिजमा आउन लागेको यो फिल्ममा दिव्या रायमाझी, आना शर्मा, राजवल्लभ कोइराला, दिव्य देव, सुशील सिटौला लगायतका कलाकारहरुको पनि अभिनय छ ।

राजन भुसालको डेब्यू निर्देशनमा तयार भएको यो फिल्ममा थमन कुमार भण्डारीको लगानी छ । मोती कार्की क्रियटिभ निर्माता रहेको फिल्ममा तोरन क्षेत्री लाइन प्रोड्युसर छन् । आकाश बराल र राजन भुसालले यो फिल्मको कथा लेखेका हुन् ।

अदृत फिल्मस् र मोती फिल्मस्को प्रस्तुतिमा तयार भएको फिल्ममा नरेन्द्र मैनालीको छायांकन छ । रोयल भीमसेनले पहिलो पोस्टर आलोचित भएपछि दोस्रो पोस्टरमा मिहिनेत गरेको देखिन्छ ।

शिशिर खाती र किरण थापाको कोरियोग्राफी रहेको फिल्ममा अष्ट महर्जनको एक्सन, कृष्णमान तामाङको आर्ट, हर्कुलस बस्नेत, रोहित शाक्य र एलिस कार्कीको संगीत छ । फिल्ममा निमेष श्रेष्ठको सम्पादन छ । 

यो फिल्मले एउटा सामान्य केटाको एक्टर बन्ने सपनाको कथा भन्छ ।