‘मायाबी’ कार्तिक १५ मा रिलिज गर्न दिवाकरलाई कस्तो वाध्यता ?

निर्देशक दिवाकर भट्टराईले आफू निर्देशित फिल्म ‘मायाबी’लाई कार्तिकको १५ गतेबाट रिलिज गर्नुपर्ने वाध्यता आएको उल्लेख गरेका छन् । उनले, कस्तो वाध्यता हो भन्ने खुलाएका छैनन् । 

लभ स्टोरी कथामा निर्माण भएको यो फिल्मको प्रदर्शन मिति तोक्न यसको निर्माणपक्षलाई सकस भइरहेको थियो । तर, अब लक्ष्मी पूजाको दिनबाट यो फिल्म रिलिज हुने पक्का भइसकेको छ । यो मितिमा नायक प्रदीप खड्का अभिनित तथा राजन भुसाल निर्देशित फिल्म ‘एक्टर’ पनि रिलिज हुँदैछ । 

‘मायाबी’मा नायक पल शाह मुख्य भूमिकामा छन् । पलको फिल्मलाई प्रदीपको फिल्मसँग किन जुधाइयो भन्ने चर्चा पनि अहिले चलिरहेको छ । 

दिवाकरले भने कार्तिक १५ मा फिल्म रिलिज गर्नुको पछाडि कसैसँग लडाई नभएर आफूहरूको वाध्यता भएको उल्लेख गरेका छन् । उनले ६ बर्ष अगाडि आफूले देखेको सपनाको रुपमा ‘मायाबी’लाई परिभाषित गरेका छन् । उनले ‘एक्टर’को टिमसँग मिलेर सौहार्दपूर्ण वातावरणमा फिल्मको प्रमोशन गर्ने  वाचा समेत गरेका छन् । 

पल शाह, दीपिका प्रसाँई, सुशील सिटौला, करिश्मा श्रेष्ठ, समिम खान अभिनित यो फिल्म कार्तिक १५ मा रिलिज हुने भएपछि फिल्म क्षेत्र तरंगित भएको छ ।