‘सानो संसार’को ‘मग मग फूलबारी’ सार्वजनिक

फिल्म ‘सानो संसार’को पहिलो गीत सार्वजनिक गरिएको छ । असोजको ११ गतेबाट रिलिजमा आउन लागेको यो फिल्मको ‘मग मग फूलबारी’ सार्वजनिक गरिएको हो ।

राजनराज सिवाकोटीको शब्द तथा संगीत, मेलिना राई र सिवाकोटीको स्वर यो गीतमा छ । फिल्मका सबै कलाकारहरूलाई यो गीतमा फिचरिङ गरिएको छ । शरद महत्तोले खिचेको यो गीतको भिडियोमा सुजैन खड्का र मनोज खड्काको कोरियोग्राफी छ ।

पारिवारिक कथावस्तुमा निर्माण भएको यो फिल्ममा सीतादेवी तिमल्सेना, राज पंगेनी शर्मा, अनु दाहाल, अन्जसा रिजाल, शिशिर सिवाकोटी, सरिता भण्डारी र जीवन गौतमको अभिनय छ । यी सबैले यही फिल्मबाट डेब्यू गर्दैछन् ।

राजधानी मिडिया एड प्रोडक्सन र प्रिन्सेस मुभिजको व्यानरमा निर्माण भएको यो फिल्ममा अर्जुन कुमारको लगानी छ । माधव वाग्ले फिल्मका कार्यकारी निर्माता हुन् ।

सिद्धार्थ पुडासैनीको लेखन तथा निर्देशन रहेको यो फिल्ममा सरिष्मा खत्रीको कथा, प्रविन खड्काको छायांकन, रोमी तन्डुकारको सम्पादन छ ।