आँचल भन्छिन्–‘अहिले अनुहार होइन कथा बिक्छ’

भदौको १४ गते अर्थात् शुक्रबारबाट रिलिजमा आउन लागेको फिल्म ‘वर एण्ड वधु’को प्रचारमा दौडधूप गरिरहेकी नायिका आँचल शर्माले आफूले कुनै पनि कुराको दबाब लिन छाडेको बताएकी छिन् । 

मेरो फिल्मसँग कुराकानी गर्दै आँचलले भनिन्–‘मैले स्टारडमको चाप खुबै लिएँ तर, अहिले यस्तो दबाब लिन मन लाग्दैन । अहिले दर्शक कुनै पनि कलाकारको अनुहार हेरेर हलसम्म जानु हुन्न ।’
आँचलले फिल्मको कथावस्तु नै उत्कृष्ट भएको खण्डमा दर्शक हलसम्म आउने दाबी गरिन् । भनिन्–‘अहिले कथावस्तु, फिल्म नै राम्रो हुनुपर्छ । होइन भने जुन स्टार लिए पनि फिल्म चल्दैन । फिल्म नै रोचक भएको खण्डमा दर्शकले मन पराउनु भएको छ । यसैले, मैले अहिले स्टारडमको भार बोक्न छाडेकी छु ।’

आँचलले आफू फिल्म ‘वर एण्ड वधु’ प्रति निकै ढुक्क रहेको समेत तर्क गरिन् । 

मिलन चाम्सको निर्देशनमा तयार भएको यो फिल्ममा आँचललाई विवेक कर्मचार्यले साथ दिएका छन् । विवेकले पनि फिल्मको कथावस्तु, मेकिङ नै रोचक रहेकाले दर्शकले मन पराउनेमा विश्वास व्यक्त गरे ।