‘तेल भिसा’को ‘हरि नाम झैं’ सार्वजनिक

शंकर घिमिरेको लेखन तथा निर्देशनमा तयार भएको फिल्म ‘तेल भिसा’को पहिलो लिरिकल भिडियो ‘हरि नाम झैं’ सार्वजनिक गरिएको छ । सोमबार श्रीकृष्ण जन्माष्टमीको अवसर पारेर फिल्मको पहिलो गीत सार्वजनिक गरिएको हो ।

कल्याण सिंहको संगीत तथा हर्क साउदको शब्द रचना रहेको गीतमा निशान भट्टराई र समीरा थपलियाको स्वर छ । फिल्मका मुख्य कलाकारहरू विपिन कार्की, वर्षा राउत, पुजा चन्द, ऋचा घिमिरे, वुद्दि तामाङ र सुचित्रा उप्रेतीलाई लिरिकल भिडियोमा फिचरिङ गरिएको छ ।

फिल्मका मुख्य कलाकार विपिन कार्कीकी स्वर्गीय आमा सरस्वती कार्कीप्रति यो गीत समर्पित गरिएको छ । यो फिल्ममा नायक विपिन कार्कीको दोहोरो भूमिका छ । यो फिल्म मंसिरको ७ गतेबाट नेपाल र विदेशमा एकसाथ रिलिज हुनेछ ।

वेल्डन क्रियसनको व्यानरमा ऋचा घिमिरेको प्रस्तुति रहेको यो फिल्ममा अनिल पाण्डे र शिवराज कार्कीको लगानी छ ।

प्रिन्स युवराज कार्की र श्रुती दाहाल कार्यकारी निर्माता रहेको फिल्ममा सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्वाजको संगीत, अजय खड्काको सम्पादन छ ।