‘खुस्मा’को ‘रुकुम मैकोट’ गीतमा धिरज र उपासनाको छमछमी

असोजको ३ गतेबाट रिलिजमा आउन लागेको फिल्म ‘खुस्मा’को दोस्रो गीत ‘रुकुम मैकोट’ सार्वजनिक गरिएको छ । काठमाडौंमा आयोजित पत्रकार सम्मेलनमा एसडी योगीको संगीत, सुरेन्द्र रानाको शब्द, योगी र शान्तिश्री परियारको स्वर रहेको गीत सार्वजनिक गरिएको हो ।

यो फिल्मको गीतको भिडियोमा मुख्य कलाकारहरू धिरज मगर र उपासना सिंह ठकुरीलाई फिचरिङ गरिएको छ । रिकेश गुरुङ संगीत निर्माता रहेको फिल्ममा सुरेन्द्र राइको कोरियोग्राफी छ । एम मिडिया प्रालिको ब्यानरमा निर्माण भएको फिल्ममा अशोक थापा मगरको लेखन तथा निर्देशन छ ।

फिल्ममा वीर बहादुर लामा, चन्द्र बहादुर भट्टचन, मान बहादुर धनाह मगर र बेतान मगरको लगानी छ । सुस्मिता बुढाथोकी सह–निर्माता रहेको फिल्ममा दीपक बज्राचार्यको छायांकन छ । यसअघि सार्वजनिक गीत र ट्रेलरलाई दर्शकले रुचाएका छन् ।

फिल्ममा माओत्से गुरुङ, खड्क बहादुर पुन, सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगर लगायतको अभिनय छ ।

मगर समुदायको परिवेशमा निर्माण भएको प्रेमकथामा आधारित यो फिल्मले जनयुद्धको प्रभावका बीच अंकुराएको प्रेमलाई पर्दामा उतारेको छ । फिल्ममा एसडी योगी र छान्जु पार्कको संगीत, सुरेन्द्र राना, राम अविरल बिष्ट र निर्देशक थापाको गीत छ ।