‘नरसिंहाः अवतार’: राज कटुवालका लागि ठूलो अवसर

उसो त नायक राज कटुवालले यसअघि पनि केही फिल्ममा काम नगरेका होइनन् । तर, केही बर्ष अगाडि केही फिल्ममा काम गर्दाको समय र अहिलेको समयमा राज बदलिएका छन् । फिल्मका लागि उनले गरेको मिहिनेत पनि गज्जबकै छ । 

राजले आफूलाई पूर्ण रुपमा परिवर्तन गरेका छन् । जिम धाएर शरीर सुगठिलो बनाएका छन्, एक्सन सिक्दैछन् । उनको यो परिवर्तन फिल्म ‘नरसिंहाः अवतार’का लागि हो । 

भदौको अन्तिमबाट छायांकनमा जान लागेको यो फिल्ममा नायक राजेश हमालसँगै राजले पर्दा शेयर गर्दैछन् । फिल्मका मुख्य तीन पुरुष कलाकारमध्ये कटुवाल पनि एक हुन् । 


फिल्ममा राजेश हमाल, निर शाह, सरोज खनाल, प्रशान्त ताम्राकार राज कटुवाल, नीति शाह, सनिषा भट्टराई, दीपा शाही फाइनल भइसकेका छन् । 
फिल्ममा राज कटुवालको भूमिका के हो भन्ने खुलेको छैन ।

तर, उनको मिहिनेत हेर्दा यसपटक उनले दर्शकलाई विशेष उत्साह पैदा गर्न सक्ने देखिन्छ । कटुवाल यो फिल्ममा जोडिन पाउँदा निकै खुशी छन् । त्यसमाथि नायक हमालसँग पर्दा शेयर गर्न पाउनु कटुवालका लागि आफैमा विशेष अवसर हो ।

यो अवसरको उनले सही तरिकाले सदुपयोग गर्न सके भने, उनको करिअर नै नयाँ ढंगबाट अगाडि बढ्ने निश्चित छ ।