म नजोडिएको प्रोजेक्टको कुरा गर्न चाहन्नँः आना शर्मा

नायिका आना शर्माले फिल्म ‘जेरीः अन टप’बाट बाहिरिएको खबर मिडियाबाट मात्र थाहा पाइन् । सुरुवातमा यो फिल्ममा आना र नायक अनमोल केसीको जोडी बाँधिने पक्का भएको थियो ।

तर, एकाएक नायिका जसिता गुरुङको प्रवेश भएको खबर आयो । आनाको बिषयमा भने निर्माणपक्षले केही पनि बोलेन । यसपछि, आनाले सामाजिक संजालमा लामो स्टाटस लेख्दै आफ्नो असन्तुष्टि पोखिन् । 

आना हाल फिल्म ‘एक्टर’को छायांकनमा व्यस्त छिन् । यो फिल्मको छायांकन अब केही दिनमा नै सकिँदैछ । 

‘जेरीः अन टप’बाट बाहिरिएपछि पहिलो पटक मिडियासँग कुराकानी गर्ने क्रममा आनाले यो फिल्मको नाम नै लिन चाहिनन् । उनले भनिन्–‘भएको कुरा त मैले स्टाटसबाट स्पष्ट पारिसकेको छु । अहिले म उक्त प्रोजेक्टमा आवद्ध छैन । यसैले, म आफू आवद्ध नभएको प्रोजेक्टको बिषयमा सार्वजनिक रुपमा कुरा गर्न चाहन्नँ ।’

आनाले सार्वजनिक रुपमा फिल्मको बिषयमा कुरा गर्न नचाहेर ‘जेरीः अन टप’को नाम नै लिन चाहिनन् । उनले, बरु ‘एक्टर’ फिल्मका नायक प्रदीप खड्काको सामाजिक संजालप्रतिको रुचिको बिषयमा कुरा गरिन् । उनले, प्रदीप सामाजिक संजालमा निकै कम सक्रिय भएको तर्क गरिन् । एउटा सन्देश पठाएको केही दिनपछि मात्र प्रदीपको जवाफ आउने गरेको उनले बताइन् । 

प्रदीप र आनाको मुख्य भूमिका रहेको यो फिल्म कार्तिकको १५ गतेबाट रिलिजमा आउँदैछ ।