समाजलाई झक्झकाउने ‘देवी’को ट्रेलर

फिल्म ‘देवी’को ट्रेलर काठमाडौंमा आज एक कार्यक्रमको आयोजना गर्दै सार्वजनिक गरिएको छ । भदौको २१ गतेबाट रिलिजमा आउने यो फिल्मले समाजमा घट्ने बलात्कार जस्तो जघन्य अपराधको घटनाको कथा भन्छ ।

यस्तो घटनामा कानुनले पार्ने प्रभाव र त्यसले निम्त्याउने परिणामको कथा फिल्ममा प्रस्तुत गरिएको छ । फिल्ममा संजोग राइको निर्देशन छ । फिल्ममा शिल्पा मास्केको मुख्य भूमिका छ । शिल्पा फिल्मको सह–निर्मात्री समेत हुन् । शिल्पाले फिल्मको कथा निकै राम्रो लागेकाले आफूले निर्माण पनि टिमलाई साथ दिएको तर्क गरिन् । समाजलाई सचेत बनाउने र सन्देश प्रवाह गर्ने फिल्मको हिस्सा बन्न पाउँदा खुशी लागेको उनको भनाई छ ।

क्राइम थ्रीलर जनरामा निर्माण भएको यो फिल्ममा अजय गौतम र संजोग राइको कथा छ । फिल्मको सार्वजनिक प्रदर्शनमा बाँसुरी फिल्मस्ले सहकार्य गरेको छ । यो फिल्ममा शिल्पा मास्के, गौरव पहारी, नाजिर हुसेन, टिका पहारी, प्रभाकर न्यौपाने, ध्रुव कोइराला, निरिक्षा घतानी, विशाल पहारी, निरु खड्का, जीवन जंग खड्का र विकास पन्तको अभिनय छ ।

सन्जेन थापा फिल्मका द्धन्द्ध निर्देशक हुन् । फिल्ममा रेमन गुरुङ, नारायण राई र संजोग राइको लगानी छ । जावेद खान कार्यकारी निर्माता रहेको फिल्ममा शिल्पा मास्के, उजेन नोर्वे गुरुङ र मिलन लामा सह–निर्माताको रुपमा छन् ।

जोएल फ्रोमको छायांकन रहेको फिल्ममा अजय गौतम र संजोग राइको पटकथा छ ।