‘जेरीः अन टप’मा संगीत भर्ने अवसर

फिल्म ‘जेरीः अन टप’को छायांकन केही दिनमै सुरु हुँदैछ । अहिले यो फिल्मको क्लोज क्याम्प चलिरहेको छ । यसैबिच, यो फिल्मको निर्माण टिमले संगीतकारको खोजी गरेको छ ।

कुनै पनि सुन्दर सांगीतिक धुनबिना हरेक प्रकारका प्रेमकथा अपूरो हुने भन्दै निर्माण कम्पनी अनन्या फिल्मस्ले आवेदनको आह्वान गरेको हो । फिल्मको शीर्षकमा थिम गीत तयार पार्न चाहनेहरूलाई अवसर प्रदान गरिएको निर्माता सरोज न्यौपानेले जानकारी दिए ।

इच्छुक जो कसैले पनि ‘जेरी अन टप’को प्रेमिल पृष्ठभूमिमा रहेर संगीत तयार गरि यही भदौ मसान्तसम्म अनन्या फिल्मस्को आधिकारिक इमेलमा पठाउन सक्ने निर्माणपक्षको भनाई छ । यो फिल्ममा कालीप्रसाद बाँस्कोटा, रिकेश गुरुङ र जोहन चाम्लिङ राई सांगीतिक डिपार्टमेन्टमा छन् ।

सुयोग गुरुङको निर्देशनमा बन्न लागेको यो फिल्ममा अनमोल केसी, आँचल शर्मा र जसिता गुरुङको मुख्य भूमिका रहनेछ । फिल्ममा दीपक भण्डारीको पनि लगानी रहनेछ ।

फिल्मको प्रदर्शन मिति फागुन २ गतेलाई तोकिसकिएको छ । फिल्मलाई उपत्यकामा रीच इन्टरटेन्मेन्ट र मोफसलमा एफडी कम्पनीले वितरण गर्नेछन् ।