‘बेहुली फ्रम मैघौली’को ‘छड्के सलाम’ गीत रिलिज

असोजको १७ गतेबाट रिलिजमा आउन लागेको फिल्म ‘बेहुली फ्रम मेघौली’को तेस्रो गीत आज एक कार्यक्रमको आयोजना गर्दै सार्वजनिक गरिएको छ । ‘छड्के सलाम’ बोलको बिहेको माहोल दर्साउने गीत आज सार्वजनिक गरिएको हो ।

विवाहको सेटअपमा तयार पारिएको गीतमा फिल्मका मुख्य कलाकारहरू निश्चल बस्नेत, स्वस्तिमा खड्का, सिम्रन खड्का, विजय बराल र बसुन्धारा भुसाललाई फिचरिङ गरिएको छ । सार्वजनिक रत्यौली गीतले दर्शकको मन जित्ने विश्वास निर्माणपक्षको छ ।

जयन जे वाइवाको संगीत र शब्द रहेको यो गीतमा कालीप्रसाद बास्कोटा र बबीना किराँतीको स्वर छ । सार्वजनिक गीतको भिडियोलाई प्रदीप लामा र केविका खत्रीले कोरियोग्राफी गरेका हुन् ।

यो फिल्ममा विजय बराल, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टिका पहारी, प्रभाकर शर्मा, लुनिभा तुलाधर, मुकुन्द मैनाली, रामबाबु रेग्मीको अभिनय छ । 

ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको फिल्ममा साजन काफ्ले र आकाश बरालको लेखन तथा निर्देशन छ । फिल्ममा स्वस्तिमा र निश्चलको लगानी छ । 

फिल्मका कार्यकारी निर्माता फिरोज खड्का र शंकर पाण्डे हुन् । फिल्ममा नरेन्द्र मैनालीको छायांकन, निमेष श्रेष्ठको सम्पादन छ ।