किन बढ्दैछ आर्यनको माग ?

नायक आर्यन सिग्देल एक दशक अगाडि नम्बर १ पोजिसनमा थिए । फिल्म क्षेत्रमा उनको माग निकै थियो । तर, आफ्नो स्टारडम सम्हाल्न नजान्दा उनी खस्किए । यसपछि भने उनको करिअर निरन्तर ओरालो लाग्यो । 

तर, फिल्म ‘पुजार सार्की’पछि भने उनको माग फेरि चुलिन थालेको छ । उनी, एकपछि अर्को फिल्ममा अनुबन्धित भइरहेका छन् । आर्यनले मुख्य भूमिकामा रहेर काम गरिरहेको फिल्म हो ‘के घर के डेराः घर नम्बर २’ । यो फिल्मको हाल धमाधम छायांकन भइरहेको छ । फिल्मलाई माघको ११ गतेबाट रिलिजमा ल्याउने घोषणा निर्माणपक्षले गरिसकेको छ ।

आर्यनले फिल्म ‘गाउँ नै रमाइलो’ पनि साइन गरिसकेका छन् । तर, यो फिल्म कहिले बन्छ टुंगो लागेको छैन । 

उनै, आर्यनले फिल्म ‘छक्का पन्जा ५’मा पनि विशेष भूमिकामा काम गरेको बताइन्छ । तर, निर्माणपक्षले अहिलेसम्म यो बिषयमा केही पनि बोलेको छैन । 

आर्यनले अब फिल्म ‘पिताम्बर’ पनि साइन गरेका छन् । यो मल्टिस्टारर फिल्म हो । फिल्ममा उनको भूमिका के हो भन्ने खुलेको छैन । 
आर्यनको हातमा एकपछि अर्को फिल्म परिरहेको छ । उनी, फिल्म क्षेत्रमा पुरानै पोजिशन खोजिरहेका छन् ।