को हुन् ‘पिताम्बर’ ?

निर्देशक कृषा चौलागाईंले निर्देशन गर्न लागेको नयाँ फिल्म ‘पिताम्बर’ चर्चामा छ । विशेषगरि, कलाकारहरुको लाइनअपका कारण यो फिल्मको चर्चा बढेको हो । 

यो फिल्मको मुख्य भूमिकामा नायक प्रदीप खड्का र सौगात मल्ल छन् । सामाजिक संजालमा निर्देशक चौलागाईंले सार्वजनिक गरेको तस्विरमा पनि यी दुई कलाकार एकसाथ देखिएका छन् । त्यसमध्ये कृषाले ‘को हुन् पिताम्बर’ भनेर लेखेकी छिन् । यसबाट फिल्ममा ‘पिताम्बर’ को हो भन्ने रहस्य बनाउन खोजेको देखिन्छ । 

फिल्मको पहिलो चरणको छायांकन गतबर्ष नै भएको हो । भदौबाट दोस्रो चरणको छायांकन सुरु गर्ने तयारी निर्माणपक्षको छ । 

फिल्ममा अनुप विक्रम शाही, दिव्य देव, आँचल शर्मा, सुरक्षा पन्त, सुपुष्पा भट्ट, प्रमोद अग्रहरी लगायतका कलाकारहरुको पनि अभिनय रहनेछ । 

यो फिल्मलाई पूर्ण रुपमा एक्सन कथामा बनाउने तयारी कृषाको छ । यो फिल्मको बजेट नै ५ करोड लाग्ने बताइएको छ । 

तर, फिल्मको रिलिज अगाडि दर्शकलाई भने को हुन् त ‘पिताम्बर’ भन्ने कौतुहलता रहने देखिन्छ ।